Morre a muller rescatada do mar e evacuada da praia dos Castros, en Ribadeo

Unha muller de 49 anos, veciña de Oviedo, que estaba na localidade de vacacións, faleceu tras estar a punto de afogar na tarde do venres e sufrir fortes golpes contra as rochas no areal dos Castros.

Morreu no hospital da Mariña, lugar á que a trasladaron os servizos sanitarios do 061, tras intentar reanimala durante dúas horas na praia.

Un aviso dun particular pasadas as seis da tarde do venres mobilizou as emerxencias ante a presenza dunha muller aboiando na auga. Uns bañistas que estaban nos Castros lograron sacala do mar, pero cando a rescataron xa estaba en parada cardiorrespiratoria.

Axentes da Policía Local e da Garda Civil participaron nos traballos de reanimación ata a chegada dos servizos sanitarios que intentaron recuperala mediante manobras de reanimación. Unha vez estabilizada, trasladárona ao hospital da Mariña, onde finalmente morreu.

Ao parecer, a marea arrastrou a muller ata unha zona de rochas da praia de Ribadeo, onde aínda non estaba operativo os servizo de socorristas. Ata o lugar desprazáronse axentes da Garda Civil. da Policía Local e efectivos de Protección Civil de Ribadeo e Barreiros. Tamén se lle deu aviso do accidente ao helicóptero Pesca 2 de Gardacostas da Xunta e a Salvamento Marítimo pero non chegaron a actuar.