Moncho Fernández recupera a Dragan Bender para xogar en Bilbao
David Walker aínda non está recuperado da lesión no pé
O internacional croata Dragan Bender superou a escordadura de nocello que lle impediu xogar contra o Barça e estará a disposición do técnico Moncho Fernández para a visita á pista do Bilbao Basket:
“Dragan incorporouse de forma progresiva aos adestramentos e esperamos que chegue sen problemas ao partido do domingo”, asegurou en conferencia de prensa o adestrador do Monbus Obradoiro, a quen lle preocupa máis a lesión do estadounidense David Walker.
O ala segue sen superar as molestias que arrastra desde hai semanas na fascia plantar, polo que a próxima semana someterase a un novo tratamento.
“Está a facer parte do traballo co grupo porque é un tipo de lesión para o que o descanso absoluto non é recomendable, por iso hai que buscar un equilibrio entre o traballo e que a dor non se dispare”, explicou Moncho Fernández.
O técnico santiagués confía en que co novo tratamento poidan ver “a luz ao final do túnel” porque o xogador está a poñer “todo do seu parte” para superar a lesión e axudar o equipo na pista.
