Mingo, auténtico home gol do Arenteiro no empate do Espiñedo

O Arenteiro empatou no Espiñedo diante do Barakaldo, nun partido en que tivo as mellores ocasións, pero tivo que recorrer a Mingo, practicamente o seu único argumento goleador, para equilibrar o marcador despois do 0-1 de Eric Pérez.

O cadro galego levou a iniciativa do partido durante todo o tempo e, malia a non dominar de xeito total, si creou máis perigo, especialmente con balóns a Mingo. O dianteiro non foi quen de rematar primeiro diante de Ispizua. Despois si que conectou o remate, pero de xeito defectuoso e rexeitouno o porteiro. Un Ispuzua que despois atallou outro remate de Jordan.

A segunda metade comezou cun susto para os galegos. Un córner para o Barakaldo que rematou lixeiramente desviado Unai Naveira. Pero o Arenteiro axiña volveu coller o mando, e Ispizua tivo que estar moi atento para sacarlle a pelota a Mingo, nunha acción que foi revisada despois por un posible penalti sobre David Ferreiro. O árbitro non cambiou a súa decisión ao ver o contacto repetido.

Logo doutra gran ocasión que Diego Moreno rematou ás nubes a centro de Jordan, o Barakaldo volveu crear perigo nun balón á área. Foi cun remate de Muñoz que ía a porta, pero que rexeitou Mingo.

Foi o preludio do primeiro gol. Unha acción pola dereita, con pase cara a Eric Pérez, que se moveu na frontal e disparou raso para batir a Diego García. Puido ampliar a renda a seguir o cadro vasco, cun remate de Unai Naveira que saiu lambendo o poste.

Pero o que marcou foi o Arenteiro. E foi a balón parado. Asistía ao saque dunha falta David Ferreiro, e marcaba cunha impoñente cabezada Mingo, que acumula cinco dos seis goles do seu equipo na temporada. Empate no Espiñedo. O Arenteiro non perde e suma xa 8 puntos, pero acumula tres xornadas sen gañar.