Miguel Román renova co Celta: "É un orgullo para min e para toda a miña familia"
O de Gondomar fixo unha campaña brillante ás ordes de Fredi Álvarez, con 34 partidos, 4 goles, 6 asistencias e máis de 3.000 minutos sobre o terreo de xogo
O Celta segue apostando forte pola canteira coa renovación de Miguel Román, unha as novas promesas do filial celeste. O xogador continuará vinculado ao club durante as próximas tres tempadas.
"Renovar co Celta é un orgullo para min e para toda a miña familia, quería ser futbolista desde pequeno", foron as súas primeiras palabras
Tras unha campaña brillante ás ordes de Fredi Álvarez, con 34 partidos, 4 goles, 6 asistencias e máis de 3.000 minutos sobre o terreo de xogo, o de Gondomar logrou debutar co Celta en Copa do Rei fronte ao San Pedro a finais do pasado outubro e entrar na súa primeira convocatoria de liga aos poucos meses.
Agora, e despois dunha gran pretemporada cos de Claudio Giráldez, o centrocampista parece asentado na dinámica primeiro equipo e convértese así no undécimo xogador do filial que dá o salto á elite nos últimos meses.
