Miguel Fernández será o próximo alcalde de Lugo en substitución da falecida Paula Alvarellos

O concelleiro Miguel Fernández será o próximo alcalde de Lugo, en substitución de Paula Alvarellos, que morreu por un infarto o pasado 28 de febreiro. Foi a decisión adoptada nunha xuntanza que celebrou o PSOE lugués este mércores pola tarde. 

Será o terceiro rexedor da cidade en dous anos, logo da marcha de Lara Méndez e da morte de Alvarellos. Fernández, que xa optou á alcaldía cando marchou Méndez, é na actualidade responsable do departamento de Obras da Deputación Provincial.

"Comezamos esta etapa nunhas circunstancias difíciles, con moita ilusión e con moitas ganas"

Tras coñecer a súa designación, Fernández agradeceu a apoio dos seus compañeiros: "por permitirme a honra de poder traballar pola nosa cidade e polos nosos veciños e veciñas". Tamén indicou que afronta a responsabilidade con moita ilusión.

"Comezamos esta etapa nunhas circunstancias difíciles, con moita ilusión e con moitas ganas", declarou Miguel Fernández.

José Tomé asegurou que a elección de Fernández se tomou por unanimidade, de forma que será elixido como rexedor no pleno que se celebrará, previsiblemente, o próximo día 11 de marzo.

En concreto, todos os edís asinaron un documento no que se propón a Fernández como candidato, un texto que será remitido tanto ao Concello como ao BNG, socio de goberno.

Miguel Fernández nunha imaxe de arquivo xunto ás súas predecesoras, Lara Méndez e a falecida Paula Alvarellos

Fernández, que fora o número dous da candidatura socialista, xa optara á alcaldía hai pouco máis dun ano coa marcha de Lara Méndez, pero finalmente a elixida fora Paula Alvarellos. A cambio, adquiriu a acta de deputado responsable de vías e obras e mantiña, ata o momento, a súa tarefa no Concello como responsable de Transición Ecolóxica. Conta cunha dilatada experiencia na administración local tras o paso por varias concellerías, pero estivo varios meses de baixa por enfermidade, da que se recuperou en febreiro.

Desta volta semellaba ser o aspirante lóxico, pero nas últimas horas baralláranse tamén os nomes dos edís Mauricio Repetto e Ana González Abelleira. Preguntado sobre se se puxeron encima da mesa varias opcións no encontro celebrado na tarde deste mércores, José Tomé dixo que non, que o que se fixo foi unha análise global, de conxunto, tras a que se chegou a unha conclusión, sen desavinzas de ningún tipo.

Miguel Fernández rexeitou facer declaracións e asegurou que será cando asuma o cargo cando fale. "O máis educado e razoable é que permaneza calado", afirmou nunha comparecencia na que Ana González sostivo que a súa continuidade como portavoz dependerá do que decida o próximo alcalde e que ela estará ao dispor do que se decida. "Decidiremos o que sexa mellor para o grupo e para a cidade", dixo Miguel Fernández.

O futuro rexedor entrou na corporación municipal de Lugo en 2015 da man do entón alcalde López Orozco. Na xuntanza deste mércores confirmouse tamén que o avogado colombiano Waldir Sinisterra pasará a ser concelleiro do Grupo Socialista.

Fernández, primeiro pola esquerda, na xuntanza deste mércores cos seus compañeiros na sede do PSOE de Lugo (Europa Press)