Comunidades autónomas do PP e do PSOE rexeitan o acordo sobre o financiamento singular de Cataluña

Á espera de que o luns a Comisión Bilateral entre o Estado e a Generalitat de Cataluña dea o pistoletazo de saída ao financiamento singular catalán, este venres xa se posicionan desde os partidos en contra, como PP e Vox, ou a favor, como PSOE e Sumar, con excepcións entre as súas voces.

O financiamento singular formou parte do pacto de investidura de Salvador Illa como president, alcanzado entre ERC, que o denomina concerto económico, e os socialistas, que foxen dese termo; o cal, de feito, non figura no texto acordado.

Supoñerá modificar tres leis, cuxa proposición para reformalas rexistrarán conxuntamente PSOE e ERC no Congreso antes de acabar xullo, expectantes de conseguir os apoios doutros grupos.

A cesión dos impostos a Cataluña pon de acordo algunhas das comunidades gobernadas polo PSOE e as do PP. Os executivos socialistas de Castela-A Mancha e Asturias sumáronse nas últimas horas á oposición que amosou Galicia este xoves. Coinciden en rexeitar que a Generalitat recade o IRPF porque, din, rompe a igualdade entre territorios.

A Generalitat recadará todos os impostos que se xeren en Cataluña. Empezarao facendo co IRPF en 2026. Despois, de forma progresiva, xestionará o resto de impostos.

No Goberno, María Jesús Montero nega que se vaia xerar agravio e asegura que o que fan é traballar para federalizar por igual a xestión tributaria de todas as comunidades autónomas.