Marqueta vístese de heroe en Pasarón para salvar o empate cun gol no 100'
O porteiro subiu ao remate á desesperada e foi quen de igualar un encontro que parecía perdido
Os granates comezaron perdendo e non tiveron sorte, mesmo estragaron un penalti
O Pontevedra volveu á Primeira Federación cun encontro que quedará para o recordo. Non polo bo xogo despregado polos granates diante do Cacereño, senón pola acción decisiva dunha das fichaxes, o porteiro Raúl Marqueta, que salvou o empate no minuto 100 cunha cabezada despois de subir a rematar unha falta.
Porque o partido comezou mal para o equipo granate, que apañaba o primeiro gol da temporada cando so ían 9 minutos. Carlos González batía a Marqueta nun ataque rápido, establecendo o 0-1. Os mesmos protagonistas tivo a seguinte acción, tres minutos despois. Desta volta, o porteiro chegado do Ourense CF salvou aos seus no man a man.
O Pontevedra acusou o golpe pero, aos poucos, foise botando arriba, e súas foron as mellores aproximacións ata o descanso: un lanzamento de Alain Ribeiro que sacou Nieves, outro disparo de Álex González que tamén parou o porteiro, e unha acción polémica. Nos últimos minutos, Garay entrou con forza ao remate e bateu cun rival. Pediuse a revisión de vídeo, pero o árbitro determinou falta do granate que, ademais, non puido continuar no campo polo golpe na cabeza.
A segunda metade comezou con outro lanzamento lonzano que sacou Nieves pero, malia que o Pontevedra seguía dominando, o ritmo foi decaendo. Aínda así, os de Rubén Domínguez tiveron a súa gran oportunidade no minuto 73, logo dun córner que rematou cun penalti a prol do Pontevedra por un derrubamento dentro da área. Lanzouno Dani Selma, pero Nieves volveulle adiviñar a intención e impediu a igualada.
Cando xa parecía que non lles saía nada aos granates, no minuto 100 de partido, unha falta lanzada por Yelko Pino cabeceouna á rede Marqueta. O porteiro subiu ao remate para pasar á historia con este primeiro gol da volta á primeira federación, que lle serve ao Pontevedra para sumar o seu primeiro punto da temporada.