A Casa Branca di que Machado é "unha voz valente" pero enxalza o traballo de Delcy Rodríguez

A líder opositora venezolana e Premio Nobel da Paz, María Corina Machado, chegou este xoves á Casa Branca para un xantar co presidente dos Estados Unidos, Donald Trump, menos de dúas semanas despois da captura de Nicolás Maduro por forzas estadounidenses.

Segundo a axenda oficial do mandatario estadounidense, o xantar celébrase nun comedor privado da residencia presidencial e desenvolverase a porta pechada, sen acceso para a prensa.

A Casa Branca louva a Machado pero enxalza o traballo do goberno de Delcy Rodríguez

 A Casa Branca cualificou a  María Corina Machado como "unha voz notable e valente" para moitos venezolanos.

"Sei que o presidente esperaba con interese esta reunión e que confiaba en que sería unha boa e positiva conversación coa señora Machado, quen é realmente unha voz notable e valente para moitas persoas en Venezuela. Así que o presidente espera, obviamente, falar con ela sobre a realidade no país", declarou a portavoz da Casa Branca, Karoline Leavitt, nunha rolda de prensa.

Porén, Leavitt asegurou que Trump segue pensando que Machado non ten os apoios suficientes no país para liderar unha transición en Venezuela.

Ademais, dixo que o Goberno venezolano encabezado por Delcy Rodríguez cumpriu de momento "con todas as esixencias e solicitudes dos Estados Unidos e do presidente" Donald Trump desde a deposición de Nicolás Maduro a mans de Washington. 

Unha xuntanza moi agardada

Machado entrou á residencia executiva estadounidense por unha porta lateral en lugar de pola entrada principal, reservada a xefes de Estado e altos dignatarios. A activista non respondeu preguntas dos medios de comunicación.

O encontro será o primeiro entre Trump e a opositora e prodúcese despois de que forzas estadounidenses depuxesen a Maduro durante un ataque sorpresa en Venezuela, que resultou na captura e traslado do líder chavista e a súa esposa, Cilia Flores, a Nova York para enfrontar cargos por narcotráfico.

Ata o de agora, o mandatario e a súa Administración descartaron a Machado e o seu movemento opositor da primeira etapa de transición en Venezuela baixo o argumento de que a líder non "ten os apoios" necesarios dentro do país.

No seu lugar, apostaron pola vicepresidenta de Maduro, Delcy Rodríguez, que asumiu o poder como presidenta encargada baixo o aval de Trump, que asegura que a nación venezolana se atopa baixo a tutela de Washington e negociou un pacto para que EUA comercialice millóns de barrís de cru venezolano.

A reunión entre Machado e Trump na Casa Branca celebrarase á súa vez un día despois de que o republicano e Delcy Rodríguez mantivesen unha conversación telefónica en que abordaron asuntos relacionados con petróleo, minerais, comercio e seguridade. Ao remate desa conversación, Trump cualificou a Rodríguez como unha "persoa fantástica".

Despois de que medios reportasen que Machado perdería o apoio do estadounidense por aceptar o Nobel ao que o presidente aspirou abertamente, a política venezolana manifestou publicamente o seu desexo de compartir o prestixioso galardón con Trump nun intento de achegar posturas co mandatario. Con todo, o Comité do Nobel advertiu de que o premio é intransferible