Mare, do Grupo Coper, adquire Atunlo O Grove por algo máis dun millón de euros
O Xulgado do Mercantil de Pontevedra dá o seu visto e prace á oferta económica realizada pola compañía viguesa
En marzo pasado, a conserveira Atunlo entrou en liquidación ao non chegar a un acordo cos acredores
Arquivo
A empresa Mare, do Grupo Coper (Comercial Pernas), adquiriu a empresa especializada en atúns Atunlo O Grove, tras a sentenza xudicial do Xulgado Mercantil número 3 de Pontevedra emitida o pasado mércores e por un prezo estimado que supera o millón de euros.
A sentenza autoriza, ademais da transmisión do 65 % de Atunlo, a toma de control de Frigoríficos de Cambados, propiedade da primeira e que á súa vez posúe o 50 % da planta Central Lomera Portuguesa.
O Grupo Coper, unha empresa familiar dedicada á comercialización de peixe conxelado, aposta pola actividade industrial en Galicia e pretende con esta operación "reflotar" as antigas plantas de Atunlo, "grazas ao seu coñecemento do mercado, canles de aprovisionamento e a súa longa experiencia no sector".
En marzo, a conserveira galega Atunlo, con sede en Vigo e fábricas en Cambados e O Grove, entrou en liquidación ao non chegar a un acordo con acredores para que aceptasen o seu plan de viabilidade e unha quitación do 70 % da débeda.
