Manu Barreiro considera "clave" o partido ante o Granada

O dianteiro do Lugo, Manu Barreiro, catalogou como "clave" o partido do próximo sábado ante o Granada no Anxo Carro.

Considerou "difícil de entender" a dicotomía do seu rival, mellor local (26 puntos) e segundo peor visitante (6 puntos):

"É difícil de entender porque ten un grandísimo equipo, xogadores doutra categoría, é dos tres mellores, con diferenza, pero a Segunda é así, vas a campos complicados e seguro que saben que o sábado non será un partido fácil. Esperemos que lles pese, e no aspecto psicolóxico aproveitar ese tipo de cousas porque nós temos que aproveitar as debilidades do contrario", dixo en conferencia de prensa.

O dianteiro repúxose dunha "rotura pequena no ligamento lateral" do xeonllo esquerdo e a pasada fin de semana recuperou a titularidade ante a Ponferradina no Toralín, onde os brancos e vermellos enlazaron a súa segunda derrota con Fran Justo, o técnico que dirixiu ao equipo as catro últimas xornadas:

"Para nós esta semana é súper importante. Son moitas máis horas de adestramento para asimilar o que o adestrador quere. A súa intención é que sexamos agresivos, que vaiamos gañar a calquera campo. Está a verse na forma de apertar. Quere agresividade en campo contrario e ser sólidos defensivamente", revelou.

O veterano dianteiro recoñeceu que ao Lugo fanlle "falta resultados" porque ten "déficit de puntos":

"Pero imos polo bo camiño e vexo ao adestrador coas ideas claras e o equipo asentado para que vaia mellor", opinou.

O xogador santiagués dixo que teñen por diante "un partido superimportante" porque, ademais, é o último antes das vacacións.