Malas perspectivas para a castaña pola seca prolongada

Paco González é vogal da IXP da castaña. Leva décadas tirando polo sector e está desanimado. As perspectivas para a próxima colleita non son boas. Sen auga, o froito non medra e hai máis risco de enfermidades.

Bieito Barreira, produtor de castaña: "Se un ourizo pode traer unha ou tres castañas, trae unha. E iso, multiplicado por todos os ourizos do castiñeiro, son moitas".

Paco González, produtor de castañas: "Estou desanimado. O sector está desanimado. É que non somos capaces de atallar todas estes pestes que hai no castiñeiro".

Xa pasou o mesmo o ano pasado e o anterior. En dez anos, a produción de castaña en Vilardevós pasou de dous millóns de quilos a un.

"Nos últimos dez anos, un 50 por cento, acumulado. O que antes era pasar tres ou catro veces por un souto, agora son dúas", di Bieito.

"Segue habendo moitísima avespiña. Cando ataca, acaba morrendo. E as producións reducíronse moitísimo, un dez por cento cada ano", engade Paco.

Os que prezos, para máis, seguen a ser os de hai dez anos, ao redor dun euro setenta o quilo na última campaña. Insuficiente para que os máis novos se animen a seguir traballando os soutos.

"Unha persoa de vinte anos que plante hoxe un souto non vai ver rendemento ata que teña trinta anos. Os que seguimos é porque o deixaron encamiñado os nosos avós e os nosos pais. Se non, é imposible", conclúe Bieito.

Cren que a partir de agora vai ser preciso facer unha ou dúas regas no verán ou rega por goteo para garantir unha produción estable.