Máis de tres mil persoas evacuadas en León polos incendios forestais

A comunidade de Castela León é, sen dúbida, unha das máis afectadas polos incendios forestais, especialmente nas provincias de León, Zamora, Ávila ou Salamanca, onde este sábado comezaba con 26 lumes activos.

Na veciña provincia de León o principal incendio, localizado inicialmente en Yeres, xa queimou 1500 hectáreas e ameaza con unirse co de Llamas de Cabrera, co que os traballos de extinción dun lume que agora avanza sen control serían aínda máis difíciles. 

O lume e o fume obrigaron a evacuar máis de tres mil persoas na provincia de León, entre elas 200 persoas que foron rescatadas pola Garda Civil do refuxio de Collado Hermodo de Posada de Valdeón.

O principal incendio que afecta Ávila comezou en tres puntos distintos

Tamén foron evacuados moitos veciños de localidades de Ávila, onde os incendios obrigaron a suspender o tráfico ferroviario e dúas estradas de conexión con Madrid. O principal incendio rexistrado en Ávila comezou en tres puntos distintos e xa queimou 3.000 hectáreas.
A outra comunidade moi castigada polos incendios é a de Estremadura, especialmente na provincia de Cáceres. 
Tamén Asturias ten dous incendios activos e outros tres controlados ou estabilizados.

Once estradas secundarias cortadas polos incendios en Castela e León e Extremadura

O lume ou o fume impiden a circulación por once estradas secundarias de Castela e León e Estremadura.

3.400 soldados da UME e doutros corpos militares traballan nestes incendios, coa axuda das ducias de avións e helicópteros, que xa efectuaron case mil cen descargas de auga e produtos retardantes do lume sobre as zonas afectadas.