Máis de 6.000 denuncias por violencia machista nun ano en Galicia

As denuncias por violencia machista en Galicia amentaron no último ano o 1,3 %. Máis de 6.000 mulleres non aguantaron máis e deron o paso de denunciar no xulgado. Isto supón para a vítima meterse nun proceso que non é doado, como recoñece a representante de avogadas e avogados de Galicia, pero en que ten apoios.

Pilar López Guerrero, presidenta do Consello da Avogacía Galega: "A avogacía está especializada na quenda de oficio en temas de violencia de xénero. É dicir, o avogado ou avogada que estea con ela ten unha formación específica, constante e continua neses temas e está na quenda voluntaria por empatía e solidariedade con estes temas. Porque destes procesos sáese, pero son longos, son dolorosos".

A lexislación galega acaba de dar un paso relevante na loita contra todas as violencias contra a muller ao incorporar a que se efectúa mediante a tecnoloxía dixital. A voceira dos avogados valora a iniciativa e o consenso na súa aprobación.

Di Pilar López: "Ese acordo dos tres partidos do Parlamento de Galicia para min é algo marabilloso. É unha mostra de exercicio de responsabilidade polo cal felicito os tres partidos".

Pilar López incide na mensaxe ás vítimas de que o sistema está con elas e por tanto facer a denuncia é vital para parar a violencia machista.