Macron proponlle a Trump celebrar un cumio do G7 en París con rusos, ucraínos e daneses

O presidente francés Emmanuel Macron propuxo ao seu homólogo estadounidense Donald Trump un cumio do G7 en París o vindeiro xoves ao regreso do Foro de Davos que se está celebrando en Suíza. O obxectivo, abordar con el asuntos espiñentos, como o futuro de Ucraína, Groenlandia e Siria.

O mandatario galo pretende convidar a ucraínos, rusos daneses e sirios á marxe da reunión. Aos primeiros, coincidindo co cuarto aniversario da guerra en Ucraína; a Dinamarca, polo enfrontamento aberto que mantén coa administración norteamericana por Groenlandia. Así o confirmaron fontes do Elíseo despois de que Trump o desvelase na rede social Truth Social.

"Amigo meu, estamos completamente de acordo no tema de Siria. Podemos facer grandes cousas en Irán. Non entendo que fas en Groenlandia", escribiu Macron na mensaxe a Trump, que o presidente estadounidense desvelou na súa rede social.

A posición de Francia

Desde París confirman que esta mensaxe privada é totalmente real e están decididos a facer da súa presidencia do G7 un "momento útil" para contribuír ao diálogo e á cooperación.

A administración gala sostén que en Groenlandia o respecto da soberanía e a integridade territorial dos Estados non é negociable: "O noso compromiso como aliados da OTAN coa seguridade na rexión ártica segue intacto".

Engaden que en Siria, Francia colabora cos Estados Unidos en prol da unidade e a integridade territorial do país e do respecto do cesamento do fogo, sen deixar de ser fiel aos seus aliados na loita contra o grupo terrorista Estado Islámico.

E lembran a liña vermella que manteñen coas autoridades iranianas: o respecto das liberdades fundamentais.

Por iso, Macron suxire: "Podo organizar unha reunión do G7 en París o xoves pola tarde despois de Davos", onde Trump estará a partir do mércores. "Ceemos xuntos en París o xoves antes de que regreses aos Estados Unidos".

De momento, non obtivo resposta.