Lugo rebaixa impostos para atraer empresas e emprego
Os empresarios poderán beneficiarse de bonificacións de ata o 80 por cento en tributos municipais
Poderán acollerse á medida novas empresas, pero tamén aquelas que amplíen cadro de persoal
Os empresarios ven un paso na boa dirección, pero reclaman acompañalo con menos burocracia
Lugo rebaixa impostos para atraer empresas e impulsar a creación de emprego. A proposta pasar por rebaixar 3 impostos municipais, o IBI, o IAE e o imposto de construcións. A clave está no emprego. Cantos máis postos de traballo indefinidos cree a empresa, maior será a bonificación.
Entre 1 e 10 empregos, o desconto será do 50 por cento; entre 11 e 20, ascenderá ao 75 por cento e por riba dos 21, chegará ao 80 por cento.
Entre os requisitos, o emprego deberá ser indefinido e a tempo completo e as persoas contratadas deben ser desempregados inscritos como demandantes de emprego.
Os empresarios consideran que se trata dun primeiro paso na boa dirección, pero piden completalo con menos burocracia e máis e mellores infraestruturas.
O Concello busca atraer investimentos e situar a Lugo como referente na creación de emprego. Estas novas bonificacións entrarán en vigor a comezos de 2027.
