Localizan o cadáver dunha muller aboiando no encoro da Rúa
O corpo sen vida dunha muller foi atopado esta tarde aboiando no encoro da Rúa, nas proximidades da depuradora do municipio ourensán.
Foi un particular o que avisou o 112 Galicia sobre as 17:30 horas de que se vía flotar o corpo dun home no encoro da parroquia da Rúa de Valdeorras, pero despois do rescate os efectivos de emerxencia confirmaron que se trataba dunha muller.
Desde o 112 Galicia pasouse o aviso aos Bombeiros e ao GES de Valdeorras, que mobilizou os membros do grupo acuático ata o lugar dos feitos para recuperar o corpo.
O operativo foi completado polos profesionais de Urxencias Sanitarias de Galicia-061, polos axentes da Garda Civil e da Policía Local, ademais de polos efectivos de Protección Civil da localidade.
🔴 #AXEGAInforma que foi atopado o corpo sen vida dunha muller aboiando no embalse de #ARúa, en Ourense.
— 112Galicia (@112Galicia) May 27, 2023
Os efectivos dos Bombeiros, GES e Protección Civil de Valdeorras traballaron no rescate da vítima.
Interviñeron: sanitarios, @guardiacivil e Policía Local.
