José Arnau deixará a vicepresidencia de Inditex e será substituído por Roberto Cibeira
A saída de Arnau forma parte dun proceso "ordenado e programado"
Cibeira é na actualidade conselleiro delegado de Pontegadea
A remuda podería anunciarse este mércores
Europa Press
José Arnau deixará a vicepresidencia do grupo Inditex, posto que ocupa desde xuño de 2012, e será substituído por Roberto Cibeira, na actualidade conselleiro delegado de Pontegadea.
En concreto, Arnau, home de confianza de Amancio Ortega, deixará o seu posto no xigante téxtil e sairá tamén do consello de administración de Pontegadea UK dentro dun proceso "ordenado e programado". Tal e como informou este martes El Confidencial, xunto á súa baixa en Pontegadea UK, tamén se comunicou a saída das sociedades Pontegadea GB 2020 e Hills Place Sarl no marco da renovación de todo o seu consello.
No seu lugar entraron Cibeira, conselleiro delegado de Pontegadea; Marcos Fernández, country manager do grupo para Europa e Asia Pacífico, e Jaime Carro, máximo responsable legal do holding dono de Inditex.
A saída de Arnau de Inditex e a súa substitución por Cibeira podería anunciarse este mércores coincidindo coa presentación de resultados trimestrais da compañía.
Licenciado en Dereito pola Universidade de Santiago de Compostela e inspector de Facenda do Estado, Arnau é desde 2001 o primeiro executivo do Grupo Pontegadea.
