Jessica Bouzas arrinca con solidez e avanza a segunda rolda en Pequín

A vilagarciá Jessica Bouzas Maneiro (n.48 clasificación WTA) debutou este xoves con vitoria no Aberto de China, ao superar con autoridade á romanesa Jaqueline Cristian (n.42) por 6-4 e 6-0 nunha hora e sete minutos, nun duelo disputado na pista Moon do complexo pequinés.

O primeiro set resultou máis parello do que indicou o marcador final. Cristian arrincou con forza e chegou a colocarse 0-2 arriba, pero Bouzas reaccionou pronto para recuperar a desvantaxe e encadear catro xogos consecutivos. A galega pechou a manga cun 6-4 grazas á súa solidez nos intercambios e a un 73 % de primeiros saques convertidos.

No segundo parcial a española non deu opción: mostrouse intratable ao servizo -non concedeu unha soa bóla de ruptura- e aproveitou a caída física e anímica do seu rival para asinar un claro 6-0 en menos de media hora.

As estatísticas reflectiron o dominio de Bouzas, que converteu seis das dez bólas de ‘break’ que dispuxo e mostrouse firme desde o resto cun total 18 de 27 puntos gañados sobre o saque de Cristian. Bouzas, de 23 anos, avanza así á segunda rolda do torneo, onde se enfrontará á ucraína Dayana Yastremska.