Javi Rodríguez, mellor xogador de outubro tras chegar aos cen partidos co Celta

O defensa celeste converteuse no xogador MVP Estrella Galicia do mes de outubro, un recoñecemento que concede a afección celeste e que pon en valor o seu gran rendemento durante as últimas semanas de competición. Javi Rodríguez fíxose con este galardón, tras impoñerse na votación a Álvaro Núñez, Ferran Jutglà e Aleix Febas.

Javi asinou un mes especialmente brillante, demostrando a súa capacidade para achegar en ambas as áreas e ser decisivo para o equipo. O central participou directamente en catro goles durante outubro, con tres tantos e unha asistencia. Especialmente destacadas foron as súas actuacións ante o Deportivo Alavés, fronte ao que marcou un gol e repartiu unha asistencia, e ante o Celtic F. C., onde asinou un dobrete que contribuíu a unha importante vitoria europea en Glasgow.

“Foi un partido moi especial. Achegar os goles da vitoria foi algo incrible. Ao rematar o partido nin o cría”, lembra o defensa sobre aquela noite.

O de Poio tamén pensa xa nos próximos retos, co inicio da Copa do Rei no horizonte.

“É unha competición especial, así que esperamos comezala cunha vitoria e chegar o máis lonxe posible”, sinala.

Por último, Javi quixo agradecer o apoio de todas as persoas que fixeron posible este recoñecemento. 

“Moitas grazas, afección, por votarme como xogador do mes de outubro. Estou moi contento por recibir o premio e por poder achegar ao equipo con goles e de todas as formas posibles”.

Javi Rodríguez (23 años) segue batendo marcas. O central de Poio converteuse este pasado domingo, no partido contra o Levante, no primeiro futbolista da nova fornada da canteira en cumprir cien partidos co Celta.