Israel mata 32 persoas e fere máis de 80 nun punto de repartición de axuda en Gaza
As vítimas agardaban por alimento preto dun dos puntos militarizados de distribución apoiado polos EUA
O Exército hebreo asegura que está a investigar o incidente armado contra a poboación palestina
Ataque israelí contra unha escola no campo de refuxiados de Bureij. REUTERS TV
O Exército israelí matou este sábado 32 persoas e feriu máis de 80 no norte de Rafah, no sur de Gaza, ao abrir fogo contra a xente que agardaba a repartición de alimento preto dun dos puntos militarizados de distribución apoiado polos EUA, de acordo cunha fonte médica.
Segundo confirmou a EFE a fonte do depósito de cadáveres do hospital Naser, entre as vítimas están os cadáveres de 25 homes –que son os que adoitan acudir en busca de comida para as súas familias– e catro corpos máis non identificados, entre eles o dunha muller.
Outros tres corpos foron contabilizados máis tarde, de acordo cun comunicado de Sanidade, no que advirte "dun desastre humanitario sen precedentes se continúa o silencio internacional".
As tropas israelís rodearon a zona e comezaron a disparar contra a multitude, segundo testemuñas presenciais e fontes locais citadas polo diario Haaretz.
Ademais, polo menos catro persoas máis faleceron por disparos mentres agardaban a chegada de alimentos en camións, segundo detallou a EFE unha fonte local, que non especificou a localización exacta.
"Tiros de advertencia"
O Exército israelí asegura estar a investigar o disparo de "tiros de advertencia" contra gazatís a un quilómetro de distancia do punto de distribución de alimentos de Rafah.
"As tropas actuaron para evitar que os sospeitosos se achegasen, ordenáronlles que se distanciaran e, ao non facelo, dispararon tiros de advertencia. O Exército ten coñecemento dos informes sobre vítimas. O incidente está a ser investigado", detalla nun comunicado castrense.
