Investigadores descobren en Barcelona as células responsables das recaídas no cancro de colón

As células que provocan metástase neste tipo de enfermidades adoitan ser invisibles coas técnicas de diagnóstico habituais, xa que son moi pequenas e dispersas. Adoitan aparecer no fígado e no pulmón.

Para localizalas, o equipo de científicos dirixido por Eduard Batlle, investigador ICREA e xefe de grupo no CIBER Cancer (CIBERONC), xerou un modelo experimental en ratos, que recrea o proceso seguido polos pacientes que sofren recaídas e, a partir de aí, desenvolveu unha metodoloxía que permite illar unha pequena fracción de células tumorais diseminadas e ocultas no organismo.

"Son as células que poden diseminar o cancro. Despois quedar ocultas e xerar metástase", explica Eduard Batlle, doutor do Instituto de Investigación Biomédica de Barcelona.

"Se eliminamos esas células cunha tecnoloxía, unha que nos permite facelo especificamente, vemos que podemos previr a metástase", agregan os científicos do equipo.

O achado publicouse na revista 'Nature'. As células nomeáronse HRCs, polas súas siglas en inglés (High Relapse Cells o Células de Alta probabilidade de Recaída). Teñen pouca actividade no tumor primario, pero son quen de desprenderse del e migrar polo torrente sanguíneo ata acadar o fígado e o pulmón, onde permanecen ocultas durante un tempo.

O achado abre o camiño para atacalas, dado que tamén descubriron que se se activa o sistema inmunitario dos ratos, non recaen tras a operación do tumor primario, o que demostra que a inmunoterapia precoz , antes de calquera outra intervención, pode eliminar estas células antes de que comece o desenvolvemento da metástase.