Industria concede un préstamo de 132 millóns a Urovesa para un vehículo de exploración e recoñecemento
Industria concede un préstamo de 132 millóns a Urovesa para un vehículo de exploración e recoñecemento
Responde á necesidade de dotar ás Forzas Armadas da capacidade de explorar, recoñecer e vixiar o terreo desde unha posición segura
Imaxe de arquivo das instalacións de Urovesa en Valga
O Boletín Oficial do Estado (BOE) publica este xoves unha resolución que contempla a concesión por parte do Ministerio de Industria dun préstamo de 132 millóns de euros á empresa Urovesa para o desenvolvemento dun vehículo de exploración e recoñecemento.
En concreto, a resolución establece as normas reguladoras da concesión directa de préstamos a varias empresas para o desenvolvemento industrial de programas especiais de modernización nos ámbitos terrestre e aéreo.
A Urovesa, con sede en Valga, corresponden 132 millóns para o desenvolvemento do programa Vehículo Exploración e Recoñecemento, que responde á necesidade de dotar ás Forzas Armadas da capacidade de explorar, recoñecer e vixiar o terreo desde unha posición segura.
O ministerio resalta que busca proporcionar superioridade no enfrontamento, unha capacidade militar esencial, a cal permite a execución precisa de operacións, tanto en primeira liña como en liñas sucesivas, contando con toda a información necesaria para a toma de decisións.
Pola súa banda, o subdelegado do Goberno en Pontevedra, Abel Losada, felicitou a Urovesa polo seu "exemplo de excelencia e referencia internacional" e por impulsar "innovación e desenvolvemento made in Galicia".
"Cando falamos de incrementar o gasto en defensa, falamos destas cousas. E falamos de emprego local no territorio", destacou, segundo traslada a Subdelegación.
