Publicador de contidos

Publicador de contidos

Inditex gaña 3.243 millóns de euros, un incremento do 193 % respecto ao exercicio anterior

Inditex gaña 3.243 millóns de euros, un incremento do 193 % respecto ao exercicio anterior

As vendas creceron un 35,8 %, ata os 27.716 millóns de euros

Pablo Isla recibirá 23 millóns de euros, despois de 17 anos no grupo

Inditex sobe un 0,64 % en bolsa, despois de gañar 3.243 millóns o ano pasado

G24.gal 16/03/2022 07:55 Última actualización 9:50

Inditex rexistrou un beneficio neto de 3.243 millóns de euros no seu ano fiscal 2021-2022 (do 1 de febreiro de 2021 ao 31 de xaneiro de 2022), que supoñen un incremento do 193 % respecto ao exercicio anterior. Ademais, as vendas creceron un 35,8 % ata os 27.716 millóns de euros

O presidente de Inditex, Pablo Isla, destacou que tras dous anos de pandemia estes resultados demostran a "gran capacidade de adaptación a calquera circunstancia que caracteriza todas as persoas que integran esta compañía a través do compromiso e do talento".

Pola súa banda, o conselleiro delegado de Inditex, Óscar García Maceiras, destacou que "o liderado demostrado pola compañía na transformación dixital dos últimos anos sitúa a firma nunha posición inmellorable de fronte ao futuro para ofrecer a mellor experiencia na nosa proposta de moda de calidade e sostible".

Ás 11:00 horas, Pablo Isla presentou por última vez na sede de Arteixo os resultados anuais da compañía, a poucos días de que o 1 de abril Marta Ortega asuma a presidencia do grupo, no que García Maceiras ocupa xa o posto de conselleiro delegado desde o pasado mes de novembro, cando se anunciaron os cambios na dirección da firma.

O Consello de Administración propuxo aumentar o dividendo para o exercicio 2021 un 33 %, ata os 0,93 euros por acción. Propuxo tamén un dividendo extraordinario de 0,40 euros por acción para o exercicio fiscal 2022. 

Con Marta Ortega como presidenta, o grupo prevé manter a súa política de dividendos

Na nova etapa que emprende Inditex con Marta Ortega como presidenta, o grupo prevé manter a súa política de dividendos. O seu pai, Amancio Ortega, fundador do grupo, controla case o 60 % do capital, co que ingresará máis de 1.700 millóns. O Consello de Administración tamén proporá á Xunta Xeral de Accionistas un dividendo extraordinario de 0,40 euros por acción a aboar en relación ao exercicio 2022. 

Pablo Isla recibirá 23 millóns de euros, despois de 17 anos no grupo

Pablo Isla recibirá 23 millóns de euros a partir de finais de mes, e despois de 17 anos no grupo téxtil español, deixa o seu cargo á fronte de Inditex para facerse cargo Óscar García Maceiras como conselleiro delegado e Marta Ortega como presidenta. Segundo detallou este mércores a empresa téxtil ao facer público o seu informe anual de retribucións, o xerente xa percibiu o ano pasado 12,4 millóns de euros, máis do dobre ca o ano anterior.

Xunto ao seu soldo de 3,25 millóns, percibiu 4,87 millóns en concepto de retribución variable a curto prazo e 1,76 millóns en concepto de indemnización a longo prazo. Engádese a iso case 2,5 millóns a través de accións.

Isla deixa o grupo cun beneficio anual de 3.243 millóns, só 400 millóns do seu récord de beneficios, acadado en 2019, antes da pandemia.

Inditex sobe un 0,64 % en bolsa, despois de gañar 3.243 millóns o ano pasado

A acción de Inditex subiu un 0,64 % media hora despois do inicio da cotización en bolsa e tras presentar os resultados de peche do seu exercicio 2021. Ás 11:30 horas cada título de Inditex gañaba 40 céntimos de euro, ese 0,64 %, ata os 22,31 euros. No ano acumula perdas do 22,71%.

Publicidade
Publicidade
Publicidade