Iker Losada decide o duelo co Compostela cunha falta maxistral

O Celta B gañou no Vero Boquete de San Lázaro cun gol maxistral de falta directa de Iker Losada (minuto 77). Foi o máis destacado dun partido no que o Compostela aproveitou o Memorial Antonio Bermúdez para presentarse diante da súa afección. 

No primeiro tempo o Celta B demostrou máis feituras de equipo pero atopouse coa inspiración do Pato Guillén, que lle chegou a parar un penalti a Javi Gómez. O gol de Iker Losada resolveu un partido que baixou de ritmo na segunda metade por mor dos trocos.