Identificadas nove vítimas dun presunto depredador sexual en Ourense
O detido, de 21 anos, ingresou en prisión provisional sen fianza
As vítimas son menores de 16 anos
Empregaba unha vivenda abandonada, nas inmediacións dun descampado
Foi na vivenda do presunto agresor, no barrio ourensán do Couto, onde se produciu a detención.
"Catro policías estiveron aí, moitas horas". "Un rapaz que había que vivía por aquí que andaba sempre acompañado de rapaciñas e rapaciños, pero non desconfiamos de nada", comentan dous veciños da zona.
O detido, coñecido como Manu, de 21 anos, ingresou xa en prisión, polo risco de fuxida e pola gravidade dos feitos que se lle imputan: delitos continuados de agresión sexual contra, polo menos, nove vítimas, todas menores de 16 anos. A primeira que denunciou ten trece, e os investigadores non descartan que haxa máis.
Supostamente, captaba as súas vítimas con distintos enganos, como facerse pasar por un xefe da mafia, ofrecéndolles protección a cambio de sexo. Estas, coaccionadas, acudían canda el á súa casa ou a unha vivenda abandonada, nas inmediacións dun descampado, a poucos metros da casa do presunto agresor e por onde non pasaban inadvertidos.
"Eu veño todos os días pasear o can por aquí e víao coas rapazas. Como me vou meter, se me poden pegar uns trompazos? Tiñan a porta pechada cun cadeado e todo. Eu vía o movemento polo camiño todos os días", explica un veciño que pasea pola zona.
O xuíz tamén lle impuxo ao detido nove ordes de afastamento, unha por cada vítima, por se sae da prisión antes de que se celebre o xuízo.
