Harvey Weinstein, declarado culpable dun cargo de agresión sexual en Nova York

Un xurado popular declarou culpable hoxe ao outrora produtor estrela de Hollywood Harvey Weinstein dun delito de agresión sexual en primeiro grao contra unha antiga asistenta de produción, chamada Miriam Haley, que o acusou de practicarlle sexo oral á forza en 2006.

Weinstein, que hai cinco anos xa foi condenado neste Tribunal Supremo do estado de Nova York, podería enfrontar un máximo de 25 anos de cárcere por este cargo.

Con todo, tras unha turbulenta sesión este mércores, o xurado achouno non culpable doutro delito de agresión sexual en primeiro grao -o relativo á demanda da modelo Kaja Sokola- e aínda continuará deliberando mañá para acordar un veredicto sobre o cargo restante de violación en terceiro grao que tamén se lle imputa.

O cargo de violación en terceiro grao involucra á actriz Jessica Mann, que afirmou ser vítima de violación por el nun hotel de Nova York en 2013.

O magnate audiovisual foi sentenciado en 2020 no Tribunal Supremo do estado de Nova York a 23 anos de prisión polas denuncias de dúas mulleres, que tamén integraron parte da acusación neste proceso e aseguran que as agrediu sexualmente en 2006 e 2013, pero esa condena foi revogada hai pouco máis dun ano nun tribunal de apelacións alegando un erro procesual.

Haley e Mann figuraban no xuízo orixinal contra o magnate audiovisual, pero a este novo proceso sumouse Sokola, unha muller polaca que coñeceu a Weinstein cando era modelo e que asegura tamén a obrigou a practicarlle sexo oral non consentido en 2006.

Tras seis semanas de xuízo, o xurado debía considerar dous relatos antagónicos sobre Weinstein.

Por unha banda, a Fiscalía proxectou a imaxe dun todopoderoso magnate de Hollywood que aproveitou o seu poder e influencia para agredir sexualmente a mulleres que querían prosperar na industria. No lado contrario, a defensa argumentou que se trata dun exitoso home de negocios "vítima do movemento #MeToo" que mantivo relacións consentidas con modelos, actrices e asistentas de produción dentro dun vínculo afectivo, de acordo á defensa.

Practicamente durante a totalidade deste novo xuízo, Weinstein, que se declarou non culpable, mostrouse moi calmado desde a súa cadeira de rodas na sala do tribunal mentres escoitaba os dous veredictos.

Weinstein permaneceu todo o xuízo -fóra da súa asistencia ás sesións- recluído na prisión do hospital neoiorquino Bellevue debido á leucemia e problema cardíacos que padece. Máis aló deste veredicto, aos seus 73 anos cumpre desde 2022 outra condena de 16 anos por violación e agresión sexual nos Ánxeles.