Gran susto no adestramento do Breogán polo nocello de Tevin Brown
Ao escolta quedoulle o pé debaixo do soporte da canastra nunha acción da sesión do xoves
O sábado (21:00 horas) xoga diante de Xirona e coa euforia da afección despois das dúas vitorias no inicio do campionato
Gran susto no adestramento do xoves do Río Breogán. O escolta Tevin Brown sufriu un problema e quedoulle o pé debaixo do soporte da canastra. No equipo lugués aínda non sabían o alcance da lesión de nocello. Se ía quedar nun susto ou se a cousa ía a máis.
Tevin Brown (15,5 puntos de media) está a ser unha das grandes bazas en ataque do Río Breogán neste inicio de competición no que o equipo galego sumou dúas vitorias noutros tantos partidos. O sábado xogan contra o Xirona de Moncho Fernández (21:00 horas) no Pazo Universitario de Lugo diante dunha afección ilusionada.
"Iso é moi bo para Breogán, non son ninguén para quitar a ilusión" asegurou na previa Luis Casimiro. Pero o adestrador ten os pés no chan: "Como adestrador teño que ir contra corrente. Cando a cousa está mal teño que xerar ilusión e cando imos moi ben, como neste caso, poñer os pés no chan e baixar a euforia" comentou na previa do partido.
