Giráldez e a canteira: a solución do Celta estaba na casa
Giráldez e a canteira: a solución do Celta estaba na casa
Nove partidos despois da chegada de Giráldez: 16 puntos no peto, a salvación feita e os canteiráns como parte da operación rescate
O final de temporada do Celta revela que o cambio no banco de Balaídos foi determinante. Os números falan a favor de Claudio. Do adestrador que mudou o curso dos acontecementos. Cunha aposta polo fútbol vertical e pola canteira. Unha aposta arriscada que achegou 16 puntos en nove partidos. Claudio desfixo, ademais, os tópicos da inexperiencia e de ter a xogadores máis vellos no vestiario. Claudio convenceunos a todos de que outra maneira de xogar era posible.
Rafa Benítez chegou para o centenario celeste. Un foguete máis na que se presumía festa rachada para acabar en outro ano de susto. Pero dubidaba da canteira.
"Non é o mesmo a Primeira RFEFque a Primeira división".
En 28 xornadas de liga Benítez sumaba cinco vitorias nada máis, o peor rexistro en 80 anos. Un feixe de empates, derrotas e 24 puntos escasos que levan o equipo a unha situación crítica a dez partidos do final. Nos despachos, non acababan de ver clara a remuda.
A presidencia celeste cambia de adestrador no ano da oliveira dos cen e Claudio Giraldez cumpre na aposta pola casa. Nove partidos despois: 16 puntos no peto, a salvación feita e os canteiráns como parte da operación rescate.
A solución estaba na casa, e Benítez tíñaa tan a man como a tivo Claudio, pero éche ben certo, como din os vellos, que non hai peor cego ca o que non quere ver.
