Galicia impulsa na China as enerxías renovables
Alfonso Rueda reuniuse no país asiático cun dos principais proveedores de turbinas do mundo e ofreceulle a nosa comunidade como lugar para implantarse en Europa
A sede da multinacional Goldwind foi unha das paradas de Alfonso Rueda na China. Alí, o presidente da Xunta presentou Galicia como un socio estratéxico que reúne as características para a implantación da compañía chinesa en Europa.
Rueda, que estivo acompañado da conselleira de Economía e Industria, María Jesús Lorenzana, subliñou que Galicia é a terceira rexión de España en produción eólica, contando a día de hoxe con máis de 4.000 megawatts instalados, 200 parques en funcionamento e unha xeración que supón o 38,4% da electricidade producida na comunidade.
Con vistas a unha posible colaboración, o presidente galego explicou o Plan de repotenciación da Xunta, que prevé actuar nos 25 parques de maior antigüidade para retirar 800 aeroxeradores e substituílos por modelos "máis eficientes", deixándoos nunha media de 120.
Con todo, defendeu que Galicia ofrece un ecosistema de "estabilidade política e seguridade xurídica" para os investidores. Neste sentido, referiuse a ferramentas como as Zonas de Aceleración de Proxectos ou a sociedade Recursos de Galicia (RDG), a través da cal o Goberno autonómico participa directamente na promoción e financiamento de proxectos enerxéticos.
Contactos co sector turístico
Rueda tamén mantivo contactos co sector turístico. Promocionou a comunidade como destino ante empresarios do sector coa vista posta no Ano Xacobeo:
"Creo que hai moitas conexións entre o pobo galego e o chino, os valores, a tradición cultural, a identidade", asegurou.
O ano pasado chegaron a Santiago case 4.500 peregrinos chineses e na Xunta ven posibilidades de crecemento.
