Galicia gaña máis de 15.000 habitantes no último ano grazas á chegada de migrantes

Galicia contabilizou máis de 2,73 millóns de habitantes a 1 de xullo de 2026, o que supón 15.033 persoas máis que un ano antes (+0,55 %), segundo datos publicados este xoves polo Instituto Nacional de Estatística (INE), recollidos por Europa Press.

Todo iso grazas á chegada de migrantes, xa que a poboación estranxeira en Galicia sumou 19.430 persoas nos últimos 12 meses, chegando a máis de 203.000, mentres que os de nacionalidade española baixaron en 4.397 persoas, quedando en máis de 2,53 millóns.

Só no último trimestre a comunidade creceu en 4.516 persoas, un 0,16 % máis.

A nivel estatal, a poboación residente en España aumentou en 104.178 persoas durante o segundo trimestre do ano, ata situarse nun total de 49.801.559 habitantes ao 1 de xullo, o que representa o valor máximo da serie histórica, grazas ao aumento dos nados no estranxeiro. Deste xeito, o crecemento poboacional estimado en termos anuais foi de 444.205 persoas.

O crecemento poboacional de España debeuse ao incremento de persoas nadas no estranxeiro, xa que o número de nadas en España diminuíu. Esta poboación nada no estranxeiro -de 10.291.807 persoas- foi maior que a de nacionalidade estranxeira, debido aos procesos de adquisicións de nacionalidade española.

Pola súa banda, o número de estranxeiros aumentou en 87.197 persoas durante o trimestre, ata 7.437.543, mentres que a poboación de nacionalidade española creceu en 16.981.

En canto ao número de fogares situouse en 19.874.860 ao 1 de xullo de 2026, cun crecemento de 58.794 durante o segundo trimestre de 2026, segundo a estatística recollida por Europa Press.

As principais nacionalidades dos inmigrantes durante o segundo trimestre de 2026 foron a colombiana (con 34.000 chegadas a España), a venezolana (23.300) e a marroquí (21.100). Séguenas a española (18.000), peruana (16.800), brasileira (8.300), italiana (7.600), hondureña (7.200), paquistaní (6.700) e ucraína (6.600).

Pola súa banda, as nacionalidades máis numerosas dos emigrantes foron a colombiana (con 11.500 saídas), a marroquí (10.900) e a venezolana (5.900). A continuación están a peruana (5.500), romanesa (5.300)española (4.000), italiana (3.700), ucraína (3.200), chinesa e hondureña, ambas as dúas con 2.700 saídas.

Durante o segundo trimestre de 2026 a poboación creceu en todas as comunidades e cidades autónomas. Os maiores incrementos déronse na Comunidade Valenciana (0,43 %), nas Baleares (0,36 %), no Principado de Asturias (0,29 %) e en Murcia (0,29 %).