Franz Ferdinand, Os Planetas e Nacho Vegas, entre os grupos que estarán no Atlantic Fest

Franz Ferdinand, Two Door Cinema Club, Carolina Durante, Os Planetas, Shame, Nacho Vegas, Carlos Ares, Depresión Sonora, Triángulo de Amor Bizarro, Joe Crepúsculo, Aiko O Grupo, Nadadora, Alonso e Grande Osso actuarán no décimo aniversario de Atlantic Fest, que se celebrará en xullo en Vilagarcía de Arousa.

Será no décimo aniversario do festival no que, sinala a organización, participarán "artistas que marcaron unha época, outros que están a definir o presente e algúns que o farán nos próximos anos".

Será os días 17, 18 e 19 de xullo na Praia da Concha de Vilagarcía de Arousa. O venres 17 e o sábado 18 de xullo serán neste recinto principal do festival, co escenario Galicia Calidade, co apoio da Xunta de Galicia, no marco de Concertos do Xacobeo. Por el, pasarán todos os artistas desas dúas xornadas, e tamén no escenario Vibra Mahou, con sesións de DJs.

O domingo 19 de xullo a música continuará na Praza do Castro co escenario Vibra Mahou, "grazas ao apoio da plataforma de música de Mahou Cinco Estrelas que impulsa experiencias cinco estrelas ao redor do directo", engaden.