Frans Timmermans dimite como líder progresista tras perder as eleccións nos Países Baixos segundo a sondaxe a pé de urna

O político neerlandés Frans Timmermans anunciou este mércores a súa dimisión como líder do bloque progresista de ecoloxistas e socialdemócratas GroenLinks-PvdA, despois de quedar en terceiro lugar nas eleccións xerais dos Países Baixos e perder cinco escanos con respecto á representación anterior.

O exvicepresidente da Comisión Europea, que deixara o seu cargo en Bruxelas en 2023 para volver ao seu país e liderar aos socialdemócratas, asumiu a responsabilidade dun resultado que cualificou de “decepcionante”, tras non lograr superar nin a dereita radical de Geert Wilders (PVV) nin o partido liberal progresista D66, encabezado por Rob Jetten.

“Estou profundamente decepcionado, porque loitamos con todas as nosas forzas por un programa que axudase os Países Baixos a avanzar de forma social”, declarou Timmermans ante os seus seguidores en Ámsterdam, antes de anunciar que cede o liderado a “unha nova xeración”.

O dirixente afirmou que deixa o cargo “con dor no corazón”, pero convencido de que o movemento que representa “seguirá loitando por uns Países Baixos fortes, solidarios, sostibles e orientados ao futuro”. Engadiu que “non conseguiu persuadir á xente” e que “chegou o momento de dar un paso atrás e deixar o liderado a unha nova xeración”.

Un proxecto progresista común

O bloque que lideraba xurdiu en 2023 da unión entre os ecoloxistas de GroenLinks e os socialdemócratas do Partido do Traballo (PvdA), co obxectivo de presentar unha candidatura conxunta que reforzase o voto progresista ante a crecente fragmentación política do país.

A alianza, inédita na política neerlandesa recente, pretendía combinar a axenda verde e climática coa tradición socialdemócrata de xustiza económica e cohesión social.

Timmermans centrou a súa campaña na loita contra o cambio climático e na defensa do Estado do benestar, coa expectativa de unir á esquerda fronte ao avance da dereita radical.

Resultados por baixo das expectativas

Segundo o sondeo de Ipsos I&O publicado ao peche dos colexios electorais, GroenLinks-PvdA obtivo 20 dos 150 escanos do Parlamento neerlandés, por detrás dos 27 de D66 e dos 25 do PVV, que se disputan a vitoria electoral. O bloque progresista quedaría tamén por baixo dos liberais de dereita do VVD, que lograrían 23 escanos, só un menos que na actualidade, malia que as enquisas das últimas semanas lles prognosticaban un forte retroceso.