Irán envía negociadores a Islamabad malia as violacións do cesamento do fogo

Unha delegación de Irán chegará esta noite a Islamabad para iniciar as negociacións cos Estados Unidos sobre a base dunha folla de ruta de dez puntos para poñer fin á guerra, nun intento por soster a vía diplomática a pesar das denuncias de violacións do cesamento do fogo.

"A pesar do escepticismo da opinión pública iraniana (...), a delegación iraniana, invitada polo honorable primeiro ministro Shehbaz Sharif, chega esta noite a Islamabad para manter conversas serias baseadas nos 10 puntos propostos por Irán", confirmou nunha mensaxe en X o embaixador iraniano en Paquistán, Reza Amiri Moghadam.

Pola súa banda, a Casa Branca confirmou este xoves o envío dun equipo negociador de máximo nivel para as conversacións desta fin de semana.

O presidente Trump advertiu que manterá despregadas as súas forzas militases ao redor de Irán ata que se cumpra o acordo e ameazou con lanzar unha ofensiva máis grande e máis forte en caso de incumprimento.

O mandatario subliñou que existe un único conxunto de puntos significativos aceptables para os EUA que se discutirán a porta pechada, aínda que non aclarou en que consisten.

A delegación iraniana busca que as conversas viren ao redor da súa propia proposta de dez puntos, que ofrece garantías de non proliferación nuclear e a reapertura do estreito de Ormuz a cambio do levantamento das sancións e a retirada militar estadounidense da rexión.

Este movemento prodúcese mentres o primeiro ministro paquistaní Shehbaz Sharif urxe á máxima moderación tras rexistrarse ataques contra unha refinería iraniana e a derriba dun dron avanzado no sur do país.

A tregua de 14 días, mediada por Paquistán, entrou en vigor a madrugada do mércores, apenas dez minutos antes de que vencese un ultimato da Casa Blanca que ameazaba con bombardeos inminentes contra Irán.

Os ataques israelís contra o Líbano supoñen unha violación da tregua, segundo Irán

Os ataques israelís do mércores contra o Líbano constitúen unha grave violación do cesamento do fogo acordado entre Os Estados Unidos e Irán, dixo este xoves á BBC o viceministro de Asuntos Exteriores iraniano Saeed Khatibzadeh.

"Non se pode pedir un cesamento do fogo, aceptar termos e condicións, aceptar todas as zonas onde se aplica, mencionar especificamente O Líbano, e despois que o teu aliado inicie un masacre", afirmou Khatibzabeh ao programa Today de Radio 4 da BBC.

Os EUA deben elixir entre a guerra e a paz porque non poden ter ambas as cousas á vez, son mutuamente excluíntes, iso está moi claro, agregou o viceministro, que cualificou de especie de xenocidio os ataques israelís contra o Líbano.

Polo menos 254 persoas morreron e 1.165 foron feridas este mércores nunha onda de bombardeos israelís sen precedentes contra diferentes zonas do Líbano, segundo a Defensa Civil libanesa.

Foi a maior onda desde o 2 de marzo, no que Israel describiu como máis de 100 ataques aéreos contra o que considera brancos do grupo terrorista Hezbollah no Líbano, pero alcanzaron zonas residenciais.