Un edil de Cangas descúlpase tras afear a "peruanos de Vigo e marroquís de Bueu" o estado dun campo

O concelleiro de Deportes de Cangas do Morrazo, Eugenio González Fernández (PSOE), desculpouse este mércores despois de que no pleno desta semana responsabilizase a un grupo de "peruanos de Vigo e marroquís de Bueu" do mal estado dun terreo de xogo municipal.

Segundo o edil, ter as instalacións deportivas abertas ocasiona que esa xente acuda con botas de tacos de aluminio que danan o céspede, polo que defendeu regular o uso desas dependencias municipais.

A alcaldesa, Araceli Gestido (BNG), intentou amornar e suxeriulle que falase dun "lote de rapaces".

Este mércores, o Concello de Cangas publicou un comunicado do concelleiro no que este expresa os seus "máis sinceras desculpas" por unhas palabras que "foron totalmente desafortunadas e non reflicten os valores que deben guiar a convivencia" no municipio.

"Quero pedir perdón ás persoas que se tivesen podido sentir ofendidas, así como ao conxunto de veciños e veciñas. Os comportamentos incívicos nas instalacións deportivas non teñen ningunha relación coa orixe nin coa condición das persoas, e lamento profundamente trasladar unha idea equivocada", sostivo.

Eugenio González asumiu o seu "erro" e comprometeuse "a actuar con maior responsabilidade e respecto no exercicio" das súas funcións.