Formoso acusa a Rueda de "cinismo fiscal" por rebaixar o imposto de patrimonio
Critica que lles "rebaixe os impostos aos millonarios" para reclamarlle despois ao Goberno central máis fondos
O secretario xeral do PSdeG, Valentín González Formoso, acusou o presidente da Xunta, Alfonso Rueda, de practicar "cinismo fiscal", ao aplicar a bonificación do 50 % no imposto de patrimonio mentres que á súa vez "reclama ao Goberno central máis fondos".
"O que non é normal é que lles rebaixemos aos millonarios os impostos para que logo despois o presidente da Xunta, Alfonso Rueda, lle reclame ao Goberno central máis fondos. Iso chámase cinismo fiscal", declarou Formoso, que participou este domingo nun xantar da súa formación en Redondela.
"Insistimos en que Galicia non é un país de millonarios nin millonarias, senón un país de traballadores e clase media. Estamos absolutamente escandalizados con que a política fiscal de Alfonso Rueda sexa baixarlles os impostos aos máis ricos e aos millonarios deste país, que só son o 0,002 % da poboación de Galicia", engadiu.
Segundo o líder socialista, "Galicia ten que ter decisión propia en política fiscal e non ten que estar sometida ás directrices de Xénova e do Partido Popular de Madrid". "E todo, por facerlles caso a Ayuso e a Feijóo", remarcou.
Formoso salientou a importancia de que os galegos e as galegas "teñan un goberno digno, que respecte a identidade e que non utilice Galicia na confrontación co Estado".
