Cribado masivo en Forcarei, o concello pontevedrés con maior incidencia

Os veciños de Forcarei falan con resignación, volven estar no foco informativo. Na residencia de maiores foi onde se detectaron os primeiros casos, os que deron a voz de alarma. Isto foi hai 15 días e dende entón non pararon de medrar sobre todo nos últimos 7 días, con 16 novos positivos.

Desta volta hai unha diferenza co que ocorreu hai un ano, cando tamén tiñan a incidencia disparada. Agora todos os positivos están vacinados e con síntomas moi leves, asegura a alcaldesa, Verónica Pichel quen anima a todos os veciños a participar no cribado para poder controlar a situación.

Están convocados 1.600 veciños de entre 40 e 75 anos e vaise realizar no centro de saúde e non no hospital de Pontevedra, como se anunciou nun principio.

Con 726 casos por cada cen mil habitantes, Forcarei é o concello da provincia de Pontevedra coa maior incidencia.