Un terremoto de 6,9 deixa polo menos 60 mortos en Filipinas

Un  terremoto de magnitude 6,9 golpeou a pasada noite o centro de Filipinas. As autoridades estiman que o sismo causou polo menos 60 mortos, decenas de feridos e danos materiais e declararon o estado de calamidade na rexión.

"Recibimos informes de que ata 60 persoas faleceron por mor do terremoto", dixo nunha comparecencia de prensa o secretario adxunto da Oficina de Defensa Civil (OCD), Bernardo Rafaelito Alejandro.

O terremoto de magnitude 6,9 tivo lugar ás 21:59 hora local (13:59 GMT) do martes a unha profundidade de dez quilómetros preto da cidade de Bogo, segundo a axencia sismolóxica de Filipinas (Phivolcs). Desatou unha alerta de tsunami que foi retirada pouco despois.

Boa parte das vítimas concéntranse en Bogo, no norte da rexión central de Cebú e unha das máis próximas do epicentro.

Reuters

Ademais de deixar vítimas mortais e feridos, o sismo causou importantes danos en varias infraestruturas na provincia de Cebú, segundo a gobernadora provincial, Pam Baricuatro.

"O forte terremoto que sacudiu Cebú onte á noite supuxo un gran desafío para a nosa provincia", afirmou nun comunicado o vicegobernador da rexión, Glenn Soco, ao declarar o estado de calamidade, indicando que a medida é necesaria para mobilizar recursos, brindar asistencia inmediata ás familias afectadas e aplicar medidas de rehabilitación.

O centro de Filipinas foi golpeado duramente polo tifón Bualoi a pasada fin de semana, deixando 14 mortos e obrigando a evacuar máis de 350.000 persoas.

O pasado xaneiro, dous sismos de magnitude 6,1 e 5,8 golpearon o sur e o centro do arquipélago causando danos en estradas, vivendas e parte dunha escola.