Falece unha muller de 70 anos tras ser rescatada do mar en Ares

Unha muller de 70 anos faleceu en Ares tras ser rescatada do mar na zona do paseo marítimo que dá á praia da localidade, concretamente na avenida de Saavedra Meneses.

Segundo informou o 112 Galicia, foi unha moza quen, arredor das 15:10 horas, avistou o corpo flotando boca abaixo e deu a voz de alarma. Varios bañistas que se atopaban na zona colaboraron para sacar á vítima da auga.

Ata o lugar desprazáronse efectivos do 061, Salvamento Marítimo, Gardacostas, Garda Civil, Policía Local e Protección Civil. A pesar dos intentos dos servizos sanitarios por reanimala, só puideron confirmar o seu falecemento.

A falecida, con iniciais M.M.V.S., era veciña do municipio de Miño, aínda que actualmente residía en Ares.