Falece un home de 31 anos en Cambados nunha redada antidroga
Chegou ferido de bala ao Hospital do Salnés sobre as 7:30 da mañá
A operación foi declarada secreta e continúa aberta, polo que non se descartan novas actuacións e detencións
Un home de 31 anos morreu este martes nun tiroteo coa Policía que se rexistrou durante un operativo contra o narcotráfico que se está desenvolvendo na comarca pontevedresa do Salnés, segundo informaron fontes policiais. O suceso rexistrouse sobre as seis e media da mañá nas inmediacións dunha vivenda situada no lugar de Corvillón, en Cambados.
A vítima foi trasladada ao servizo de urxencias do Hospital do Salnés, onde ingresou cunha ferida de bala, segundo confirmou o Servizo Galego de Saúde. Faleceu pouco despois, durante as primeiras atencións do equipo asistencial.
O operativo policial, despregado por efectivos do grupo II da unidade de drogas e crime organizado (Udyco) de Pontevedra, despregouse á primeira hora. As actuacións, nas que colabora a Garda Civil, desenvolvéronse nos concellos pontevedreses de Vilagarcía, Vilanova de Arousa, Cambados e Ribadumia.
Por agora, apenas transcenderon detalles do operativo e, oficialmente, tampouco confirmaron se se realizaron detencións.No caso do falecido, trátase dun home que, segundo as primeiras investigacións, saíu da súa vivenda cando chegaron os axentes, cos que iniciou un tiroteo.
Con todo, o avogado da familia do falecido, Guillermo Presa, asegurou que "non se produciu ningún tiroteo", senón "un único disparo da policía"."Estaba espido en cama, a Policía rebentou a porta, asomouse para ver que pasaba e recibiu un disparo", relata o avogado, á vez que asegura que na vivenda os axentes "non atoparon ningún arma". Por conseguinte, abriuse unha investigación por homicidio da cal se fixo cargo a Garda Civil.
A operación, que continñua aberta, atópase baixo segredo de sumario e está a ser coordinada pola Praza 4 dos xulgados de Instrución de Cambados, en quenda de garda no momento dos feitos.
