Falece un mergullador que recolleron da auga no Grove
Recolleuno unha embarcación despois de que un garda rural dera a voz de alarma a través dunha chamada ao 112 Galicia
No Grove o mundo do mar está consternado polo falecemento dun mergullador que andaba á navalla na contorna da Illa da Toxa. Tiña 48 anos e era veciño de Vilanova de Arousa, David Valverde.
A vítima andaba á navalla á altura de Punta Cabreira na Illa da Toxa cando sufriu o accidente. As primeiras hipóteses apuntan a que o mergullador puido estar debaixo da auga varios minutos sen recibir oxíxeno a causa dun posible fallo no equipo de inmersión.
Unha embarcación que estaba na zona trasladou ao mergullador ata o porto do Grove logo de que un garda rural dese a voz de alarma. Ata o lugar desprazáronse os servizos de emerxencias e sanitarios que trataron de reanimalo sen éxito.
Malia os esforzos do equipo médico e dos membros do servizo municipal de Protección Civil do Grove, nada puideron facer por salvar a vida desta persoa, que entrou en parada cardiorrespiratoria. O cadáver está sendo conducido ao Porto do Corgo, no Grove.
Urxencias Sanitarias de Galicia-061 enviaron á zona unha dotación a bordo do helicóptero con base en Santiago, que tamén participou nos labores de reanimación sen éxito. No operativo colaboraron os axentes da Policía Local.
Foi unha xornada triste en toda a comarca, tamén en Vilanova onde vivía e no club subacúatico de Vilagarcía de Arousa onde a vítima era socio e adoitaba a participar en probas de pesca deportiva.
