Falece o expresidente chinés Jiang Zemin aos 96 anos

O expresidente chinés Jiang Zemin, que ocupou o posto entre 1993 e 2003, faleceu este mércores aos 96 anos de idade, segundo informou a prensa oficial. Nun breve comunicado, a axencia estatal de noticias Xinhua indicou que o exmandatario faleceu na cidade oriental de Shanghai, na que liderou a rama local do Partido Comunista da China nos anos oitenta, ás 12.13 hora local (04.13 GMT).

Segundo o citado medio, Jiang morreu por leucemia -padecemento que non fora anteriormente anunciado pola prensa nin as institucións- e fallo multiorgánico.

O político, nacido na localidade oriental de Yangzhou en 1926, foi nomeado secretario xeral do PCCh en 1989, ano no que tamén tomou as rendas do país, aínda que non foi nomeado presidente ata 1993. A prensa local lembra que a última aparición pública de Jiang foi o 1 de outubro de 2019, co motivo do Día Nacional e a celebración do septuaxésimo aniversario da proclamación da República Nacional Chinesa.

O mandato de Jiang estivo marcado pola continuidade co aperturismo económico iniciado polo seu predecesor e mentor, Deng Xiaoping, así como por fitos como a entrada da China á Organización Mundial do Comercio en 2001 ou a consecución dos Xogos Olímpicos de 2008 para Pequín, aínda que tamén pola persecución á seita relixiosa Falun Gong.