Facenda reparte 176 millóns de euros en 54 municipios galegos a través do Plan EDIL

O Ministerio de Facenda publicou no BOE a resolución da Dirección Xeral de Fondos Europeos sobre a convocatoria de axudas do Plan EDIL (Estratexia de Desenvolvemento Integrado Local) para o período 2021-2027. Beneficiarán 54 municipios galegos cun total de 176 millóns.

A Delegación do Goberno indica que Galicia, mediante 28 proxectos aceptados, recibirá 176 millóns dos 1.774 millóns de euros de fondos europeos dispoñibles neste programa.

Seis cidades galegas, entre as beneficiarias dos fondos

Segundo a listaxe publicada polo Boletín Oficial do Estado (BOE), todas as cidades galegas agás Ferrol recibirán fondos, e tamén outros tantos municipios medianos, como Redondela, Oleiros, Ribeira, Arteixo, Culleredo, Lalín, Marín ou A Estrada, entre outros.

O obxectivo destes fondos, indica a delegación, é promover o seu desenvolvemento sostible desde a tripla perspectiva ambiental, económica e social.

Santiago de Compostela celebra a consecución dos fondos

A alcaldesa de Santiago Goretti Sanmartín celebrou que Santiago conseguise estes fondos que permitirán mobilizar un investimento de 14,5 millóns de euros, dos que o 60 % corresponden a estes fondos europeos, un total de 8,7 millóns.

A rexedora remarcou que esta operación permitirá reverter a situación de vulnerabilidade e menor dinamismo na zona norte da capital galega.

Sanmartín insistiu en que este importante investimento permitirá ao goberno local avanzar no seu compromiso cos cidadáns para que en 2027 Santiago ofreza unha mellor calidade de vida aos composteláns.