Excarceran 71 persoas detidas tras as presidenciais en Venezuela
Familiares reclaman unha amnistía xeral e a posta en liberdade do resto de detidos
Nicolás Maduro nun acto de Nadal
Un total de 71 persoas detidas no contexto das protestas polas eleccións presidenciais de 2024 en Venezuela quedaron en liberdade desde a madrugada deste xoves, segundo informou o Comité de Madres en Defensa de la Verdad.
O colectivo detallou que foron excarcerados 65 homes recluídos no cárcere de Tocorón, no estado de Aragua.
Ademais, quedaron en liberdade tres mulleres do Centro Penitenciario Feminino La Crisálida, en Miranda, e tres adolescentes en La Guaira.
O comité celebrou as excarceracións, pero cualificounas de insuficientes.
As familias esixiron a liberdade plena de todas as persoas detidas tras os comicios mediante unha amnistía xeral.
O colectivo subliñou que a inxustiza segue afectando centos de familias en todo o país.
En outubro, as nais dos detidos xa advertiran de que o proceso de excarceracións permanecía suspendido desde marzo e pediran a revisión dos casos.
As liberacións deste xoves tamén foron confirmadas por unha organización de familiares de presos políticos a través das redes sociais.
Tras as eleccións presidenciais do 28 de xullo de 2024, Venezuela entrou nunha crise política pola reelección de Nicolás Maduro e pola denuncia de fraude da oposición, que reclama a vitoria de Edmundo González Urrutia.
Nese contexto, máis de 2.400 persoas foron detidas, segundo datos oficiais.
A maioría xa quedaron en liberdade, aínda que organizacións sociais e partidos opositores sosteñen que seguen existindo presos políticos.
O Goberno venezolano asegura que o país está libre de presos políticos e que as persoas encarceradas cometeron delitos graves.
.png)
