Os EUA destrúen outras dúas lanchas no Pacífico Oriental e matan cinco tripulantes
Washington di que participaban en "operacións de narcotráfico"
Son xa máis de trinta as embarcacións destruídas e polo menos un centenar de persoas mortas, supostamente asociadas ao crime organizado, dentro da campaña iniciada por Trump o pasado agosto
Os EUA atacaron xa máis de 30 embarcacións desde agosto no Caribe e no Pacífico (Imaxe: Secretario de Guerra dos EUA)
O Exército dos Estados Unidos destruíu outras dúas supostas narcolanchas en augas internacionais do Pacífico Oriental e matou cinco tripulantes que, segundo Washington, participaban en "operacións de narcotráfico".
Os dous ataques "cinéticos letais" tiveron lugar este xoves baixo as ordes do secretario de Guerra, Pete Hegseth, dentro da operación Lanza do Sur contra o tráfico de drogas que a Administración do presidente, Donald Trump, realiza no Caribe e áreas do Pacífico, informou o Comando Sur na súa conta oficial de X.
"A intelixencia confirmou que os navíos transitaban por rutas coñecidas de narcotráfico no Pacífico Oriental e participaban en operacións de narcotráfico. Un total de cinco narcoterroristas homes morreron durante estas accións: tres no primeiro buque e dous no segundo", especificou o mando militar.
O Comando Sur compartiu un vídeo onde se observan os bombardeos ás dúas lanchas, envoltas rapidamente polas chamas tras os impactos.
Con este novo ataque, xa suman máis de trinta as embarcacións destruídas e polo menos un centenar de persoas mortas, supostamente asociadas ao crime organizado, dentro da campaña iniciada por Trump o pasado agosto.
Isto coincide co aumento do escrutinio no Congreso sobre a legalidade das accións estadounidenses contra estas supostas narcolanchas, tras o polémico bombardeo que rematou dous sobreviventes dun primeiro ataque o pasado 2 de setembro no Caribe, que, segundo expertos, podería ser considerado como un crime.
A ampla despregadura militar dos EUA no Caribe, a maior en décadas, tamén redobrou a presión sobre o Goberno do presidente venezolano Nicolás Maduro, ao que Washington acusa de liderar o Cartel dos Soles, algo que Caracas nega.
