Goberno e transportistas negocian conceder visados para paliar a falta de camioneiros
O sector afirma que serían necesarios máis de 15.000 camioneiros
A automoción é un dos prexudicados pola falta de profesionais que conduzan portavehículos
Neste intre circulan en España un 25 por cento dos camións portavehículos que había antes da pandemia. A falta de condutores profesionais está detrás deste problema que afecta especialmente o sector do automoción.
Factorías como a de Stellantis, en Vigo, buscan solucións entre os seus traballadores. Ofrecen un aumento de soldo de 800 euros aos que xa dispoñan de carné e a posibilidade de formarse aos que non o teñan. Neste caso deberán asinar un compromiso de permanencia no novo posto de traballo durante dous anos.
Dende o sector do transporte negocian co Goberno a concesión de visados aos condutores estranxeiros que dispoñan de carné de camión. Queren mitigar así a carencia de profesionais que afecta a todo Europa. No noso país, estiman, faltan uns 15.000 camioneiros e a situación, din, irá peor xa que a idade media do 72 por cento dos que están en activo neste intre supera os 50 anos.
