Estrella Galicia abre a que será a maior fábrica de cervexa de España

A empresa Hijos de Rivera inaugurou este xoves en Morás (Arteixo) a que será a maior fábrica de cervexa do Estado, cunha produción de 900 millóns de litros ao ano cando estea concluída, que complementará o traballo das instalacións da Coruña.

A empresa abriu esta fábrica nunha parcela de 47 hectáreas, un proxecto cun investimento global de 500 millóns de euros.

Nun vídeo proxectado durante a inauguración, a compañía detalla que serve para "optimizar procesos" e "crecer de forma responsable" nun proxecto que ten en conta a economía circular e minimización de residuos.

O presidente executivo de Hijos de Rivera, Ignacio Rivera, explicou que será a maior fábrica de cervexa do Estado e "unha das cinco máis grandes do continente europeo".

Desvelou que a previsión do grupo é alcanzar unha facturación de 2.000 millóns de euros no ano 2030, en parte pola produción da factoría de Morás.

O presidente de Hijos de Rivera, Ignacio Rivera, durante a inauguración do novo centro produtivo de Estrella Galicia en Morás, Arteixo (EFE/Cabalar)

As instalacións suman 125 persoas empregadas -que superarán as 600 cando conclúa, con 10.000 postos de traballo indirecto- e contan cun acueduto de 6 quilómetros para achegar auga aos 70 quilómetros de tubaxes do interior.

Rivera enmarcou o proxecto dentro dunha estratexia a "longo prazo" desta empresa familiar, sobre a que cita o "reto da sucesión".

Sobre a instalación dunha segunda fábrica en Galicia -a outra está na Coruña-, revelou que noutros territorios tiñan terreos regalados e implicaban un aforro loxístico de 8 millóns de euros ao ano, pero dixo que a compañía optou por coidar o seu territorio de orixe.

O presidente da Xunta, Alfonso Rueda, identificou a cervexa Estrella Galicia como un produto que marca a identidade da comunidade: "Estamos a facer unha colonización silenciosa", chanceou. 

Remarcou a aposta da empresa por continuar en Galicia e espera que continúe a expansión da produción xunto co crecemento da compañía. Di Rueda que a corporación Hijos de Rivera é un exemplo de empresa familiar de éxito, e unha marca que se identifica con Galicia en todo o mundo.

O presidente da Deputación, Valentín González Formoso, aplaudiu que a cervexeira continúe cos seus investimentos en Galicia dentro da súa expansión internacional.

A alcaldesa da Coruña, Inés Rey, destacou o papel de Hijos de Rivera en "termos industriais e de emprego" e o "sentido da responsabilidade social corporativa" da empresa. O rexedor de Arteixo, Carlos Calvelo, agradeceu a aposta da compañía polas súas instalacións na localidade. O delegado do Goberno, Pedro Blanco, salientou na aposta pola "innovación" e no papel para seguir o crecemento "dunha Galicia mellor".