Esquece o fillo de dez anos nunha gasolineira de Cáceres e decátase 140 quilómetros despois
No coche ían ademais outro fillo de sete anos e un amigo do pai
Déronse de conta de que faltaba o neno cando foron localizados pola Garda Civil
Fotografía facilitada pola Garda Civil
Un neno de 10 anos, que viaxaba co seu pai, un amigo deste e outro irmán de 7 anos, foi deixado de forma accidental nunha gasolineira situada á altura de Aldea del Cano, en Cáceres, na A-66 e non foi ata 140 quilómetros despois, cando se decataron ao ser localizados pola Garda Civil.
Segundo informou o instituto armado, sobre as 20.30 horas deste domingo foron alertados de que deixaran só a un neno na estación de servizo. Segundo as imaxes das cámaras de seguridade da gasolineira, o menor baixaría do vehículo sen que os seus acompañantes se decatasen de que non volveu subir.
Tras as xestións realizadas a través da central 062 e ao coñecer que o vehículo circulaba en dirección norte, estableceuse un dispositivo para localizalo, que finalmente se logrou preto das 23.00 horas, á altura de Hervás (Cáceres), na mesma A-66.
Mentres tanto, o menor quedou baixo a atención de axentes da Garda Civil ata poder reunirse novamente cos seus familiares.
A Garda Civil lembra a importancia de comprobar, antes de retomar a marcha, que todos os ocupantes volveron ao vehículo, especialmente cando se viaxa con nenos, xa que "unha simple comprobación pode evitar un enorme susto".
