Adeus á máscara no transporte público; onde segue a ser obrigatoria?
A máscara segue sendo obrigatoria nos centros sanitarios, farmacias e residencias de maiores
Recoméndase o seu uso ás persoas vulnerables ou que presenten síntomas de infección respiratoria
Hoxe a máscara deixa de ser obrigatoria no transporte público. Tampouco fará falta empregala en establecementos sanitarios como ópticas ou ortopedias, onde se mantivo obrigatoria o ano pasado cando se eliminaron de interiores.
Con todo, hai varios lugares en que Sanidade considera que o seu uso segue sendo indispensable.
Esta nova medida mantén a obrigatoriedade da máscara nos centros sanitarios, farmacias e residencias de maiores, tanto para os traballadores cando estean en contacto cos residentes coma para os visitantes nas zonas compartidas. Tamén seguirá sendo obrigatoria nas clínicas dentais, de estética e fisioterapeutas.
Ademais, a Sociedade Española de Epidemioloxía non descarta o seu uso. Recoméndase que a utilicen as persoas vulnerables e aquelas que presenten síntomas compatibles coa covid-19 ou calquera tipo de infección respiratoria. Especialmente nos lugares pechados.
A normativa foi publicada esta mesma mañá no Boletín Oficial do Estado (BOE). Segundo explica a ministra de Sanidade, Carolina Darías, supón "un paso máis" na resposta dada por España en función da situación epidemiolóxica.
Medida agardada
A maioría da xente que debe usar o transporte público a diario respira aliviada. Tiñan ganas de que a normalidade subise con eles ao tren, ao bus, ao taxi ou ao avión.
Que non sexa obrigatoria non quere dicir que desapareza. O seu uso está recomendado para persoas vulnerables ou con síntomas de infección. Tamén hai quen prefire levala por precaución.
