Eslovenia recoñece a Palestina como estado soberano
Dá por boas as fronteiras de 1967 ou as que as partes involucradas decidan nun futuro acordo de paz
O parlamento esloveno recoñeceu este martes oficialmente a Palestina como Estado soberano e independente, con 52 votos a favor e ningún en contra.
O conservador e opositor partido SDS, do exprimeiro ministro Janez Jansa, non participou na votación ao considerar que a coalición violou o regulamento parlamentario, mentres que os deputados da tamén conservadora NSi abstivéronse.
Os conservadores, que tentaron aprazar a votación mediante a convocatoria dun referendo sobre este asunto, denuncian que a coalición de centro-esquerda usa o recoñecemento de Palestina como tema de campaña electoral para os comicios europeos desta semana.
Ademais, a oposición considera que o recoñecemento de Palestina se produce no momento equivocado e podería ser interpretado como unha recompensa ao terrorismo.
Coa decisión deste martes, Eslovenia recoñece a Palestina coas fronteiras de 1967 ou coas que as partes involucradas determinen nun futuro acordo de paz.
O Goberno, liderado polo primeiro ministro liberal Robert Golob, considera que a solución dos dous Estados, Israel e Palestina, é a que pode garantir unha paz duradeira en Oriente Medio, segundo o texto adoptado.
Ademais, cre que o recoñecemento de Palestina aumentará a presión internacional sobre Israel e o grupo islamista radical terrorista Hamas para que acorden un cesamento do fogo duradeiro e a liberación dos máis de cen reféns israelís que seguen retidos en Gaza.
Eslovenia, membro da Unión Europea e da OTAN, súmase desta forma a España, Noruega e Irlanda, que recoñeceron a Palestina a semana pasada.
