Escolares de Moraña protagonizan unha curtametraxe sobre a historia do galego

Fina Casalderrey volveu hoxe ao colexio onde ensinou galego durante 25 anos para celebrar a estrea do audiovisual co que mantén a sua vocación pedagóxica, agora desde a Real Academia Galega. A curtametraxe 'A orixe da nosa lingua guapa', guionizada pola escritora, baséase na súa experiencia como docente.

A protagonista é unha mestra que a imaxinación dunha alumna moi creativa transforma na meiga que fai a receita máxica da lingua. En realidade, Fátima R. Ruibal repite a fórmula que lle dera a súa mestra cando estudaba neste mesmo colexio de Moraña. O resto dos protagonistas foron os propios alumnos do centro, que coa rodaxe, dirixida por Damián Varela, aprenderon tanto de galego como de produción audiovisual.

Con esta curtametraxe de ficción a Real Academia Galega abre unha nova sección da Primavera das Letras, o proxecto web da institución que, co apoio da Deputación da Coruña, xera recursos para os ciclos de educación infantil e primaria. A nova sección, 'Lingua guapa' ampliará a oferta de contidos máis aló dos referidos ás figuras homenaxeadas no Día das Letras Galegas.